جيران
جيران وعيو عالدني وربيو التنين
بالمدرسي وطلعو سوى من المدرسي
وحب الطفوليه كبر بالزهرتين
كبر العبير بزر ورده مكبّسي
ما كان اسمو حب أول مبتداه
كان كلمه ضايعه بصفنة إله
صار اسمو حب بعد الانتباه
والحب صار جنون بعد الهودسي
وبفصل جوع العاطفة بزهو الغصون
حجر ضمير الأهل عالحلم الحنون
وعملو القطيعة وعمرو بين العيون
حواجز على قلب الضحايا مأسسي
وكلّلوها عالغني حتى تعيش
وتشبع فساطين وبرانيط ريش
ومش بالمليح البنت قبلت بالوحيش
وتباركت من لمس ايد مقدسي
وصارت لغير رفيقها الخلقت الو
وداب الحلو عا شفاف ما داقو الحلو
ورفيقها ضيّع أمل مستقبلو
من بعد ما دفنو القمر بالمحبسي
وسافر عا غير بلاد من درب الهوى
بس الهوى ما بينفعوا غيار الهوا
من مخدِّر النسيان ما وفر دوا
منشان ينسى الحب . . لكن ما نسي
و رفيقتو ال جنيو عليها اهلها
وطاعت أوامرهم بأول جهلها
ضلت خبايا نفسها تندهلها
تا ترد مركبها عا مطرح ما رسي
وراحت تَ تسأل وين شاطيها الأمين
وعالشط صار يدلها برق الحنين
ورجعت لقلب الحبها بيدر سنين
وسجن الشرايع هدموه العاشقين
وبحجارتو للحب عملو مدرسي
خليل روكز 1922-1962